Благословляется принять к исполнению.
Молитва о Святой Руси
Гóсподи Бóже сил, Бóже спасéния нáшего, прѝзри в мѝлости на смирéнныя рабы Твоя, услыши и помѝлуй нас: сé бо брáни хотящии ополчѝшася на Святýю Русь, чáюще разделѝти и погубѝти едѝный нарóд ея́. Возстáни, Бóже, в пóмощь людем Твоѝм и подáждь нам сѝлою Твоéю побéду.
Вéрным чáдам Твоѝм, о едѝнстве Цéркви Рýсския ревнýющим, поспéшествуй, в дýхе братолюбия укрепѝ их и от бед избáви. Запретѝ раздирáющим во омрачéнии умóв и ожесточéнии сердéц рѝзу Твою я́же есть Цéрковь Живáго Бóга, и зáмыслы их ниспровéргни.
Благодáтию Твоéю влáсти предержáщия ко вся́кому блáгу настáви и мýдростию Твоéю обогатѝ! Вóины и вся защѝтники Отéчества нáшего в зáповедех Твоѝх утвердѝ, крéпость дýха им низпослѝ, от смéрти, ран и пленéния сохранѝ! Лишéнныя крóва и в изгнáнии сýщия в дóмы введѝ, áлчущия напитáй, недýгующия и стрáждущия укрепѝ и исцелѝ, в смятéнии и печáли сýщим надéжду благýю и утешéние подáждь! Всéм же во днѝ сия́ убиéнным и от ран и болéзней скончáвшимся прощéние грехóв дáруй и блажéнное упокоéние сотворѝ!
Испóлни нас я́же в Тя вéры, надéжды и любвé, я́ко да едѝнеми усты и едѝнем сéрдцем исповéмыся Тебé, Едѝному Бóгу в Трóице слáвимому. Ты бо есѝ заступлéние, и побéда, и спасéние уповáющим на Тя, и Тебé слáву возсылáем, Отцу и Сыну и Святому Духу, ныне и прѝсно, и во вéки векóв. Аминь.
Т (134)